Asian Games 2026: उपांत्य फेरीसाठी 'हे' 4 संघ सज्ज; पदकासाठी आरपारची लढाई, कोण कोणाशी भिडणार?
आशियाई क्रीडा स्पर्धेतील महिला क्रिकेट स्पर्धा सध्या रंगात आली आहे. उपांत्यपूर्व फेरीतील सगळे सामने पार पडल्यानंतर आता उपांत्य फेरी खेळणारे चारही संघ निश्चित झाले आहेत. भारत, बांग्लादेश, पाकिस्तान आणि श्रीलंका या चार संघांनी उपांत्य फेरीत आपली जागा पक्की केली आहे. या सामन्यांचं पूर्ण वेळापत्रकही जाहीर झालं असून कोणता संघ कोणाविरुद्ध खेळणार, हे स्पष्ट झालं आहे.
उपांत्यपूर्व फेरीतील पहिला सामना बांग्लादेश आणि चीन यांच्यात होता, पण पावसामुळे तो रद्द करावा लागला. गुणतालिकेत आघाडीवर असल्यामुळे बांग्लादेशला उपांत्य फेरीचं तिकीट मिळालं. दुसऱ्या सामन्यात थायलंड आणि पाकिस्तान आमनेसामने आले, तिथे पाकिस्तानने तीन विकेट्स राखून बाजी मारली. तिसरा सामना श्रीलंका आणि मलेशिया यांच्यादरम्यान झाला, ज्यात श्रीलंकेने ८६ धावांनी दणदणीत विजय मिळवला. चौथ्या आणि शेवटच्या उपांत्यपूर्व सामन्यात भारताने जपानला ८ विकेट्सने धूळ चारत उपांत्य फेरी प्रवेश मिळवला. अशा प्रकारे चारही संघांनी आपापल्या गटातील कामगिरीच्या जोरावर उपांत्य फेरीचं तिकीट निश्चित केलं.
आता उपांत्य फेरीचं वेळापत्रकही समोर आलं आहे. २० सप्टेंबर रोजी सकाळी ५:३० वाजता पहिला उपांत्य सामना पाकिस्तान आणि श्रीलंका यांच्यात रंगणार आहे, ज्यात श्रीलंकेला विजयाचा प्रबळ दावेदार मानलं जात आहे. त्याच दिवशी सकाळी १०:३० वाजता दुसरा उपांत्य सामना भारत आणि बांग्लादेश यांच्यात होणार आहे. हे दोन्ही संघ नुकत्याच झालेल्या आशिया कपमध्येही एकमेकांसमोर आले होते, जिथे अंतिम सामन्यात भारतीय संघाने श्रीलंकेला पराभूत केलं होतं. आशियाई क्रीडा स्पर्धेतही अंतिम सामना भारत आणि श्रीलंका यांच्यातच होण्याची शक्यता वर्तवली जात आहे, कारण दोन्ही संघांकडे तगडे खेळाडू असून श्रीलंकेनेही या स्पर्धेत आतापर्यंत चांगली कामगिरी केली आहे. त्यामुळे या दोन्ही उपांत्य सामन्यांकडे क्रिकेटरसिकांचं लक्ष लागून राहिलं आहे.
भारत विरुद्ध जपान सामन्यात आधी फलंदाजी करणाऱ्या जपानचा संघ अवघ्या ५७ धावांत गारद झाला. श्री चरणीने सर्वाधिक विकेट्स घेतल्या, तर शेफाली वर्माने दोन विकेट्स घेतल्या. भारतीय संघाने अवघ्या पाच षटकांत, दोन विकेट्स गमावून लक्ष्य पूर्ण केलं. शेफाली वर्माने सर्वाधिक ४० धावा केल्या आणि तिला सामनावीराचा पुरस्कारही मिळाला. भारतीय संघाने दमदार कामगिरी करत उपांत्य फेरीत प्रवेश केला असून आता सुवर्णपदकावर त्यांचं लक्ष असेल. अंतिम फेरीपर्यंत पोहोचण्यासाठी बांग्लादेशविरुद्धचा सामना भारतीय संघासाठी महत्त्वाचा ठरणार आहे.
