अभिषेक शर्माची विक्रमी खेळी, 30 बॉलमध्ये शतक, भारताची अफगाणिस्तानवर आतषबाजी

भारत आणि अफगाणिस्तान यांच्यातील तिसऱ्या टी20 सामन्यात भारताचा ओपनर अभिषेक शर्मा याने एक मोठा विक्रम आपल्या नावावर केला आहे. दिल्लीतील अरुण जेटली स्टेडियमवर सुरू असलेल्या या मॅचमध्ये अभिषेकने अवघ्या 30 बॉलमध्ये शतक ठोकले. या खेळीमुळे रोहित शर्माच्या नावावर जवळपास 9 वर्षे असलेला विक्रम मोडीत निघाला. आता टी20 आंतरराष्ट्रीय क्रिकेटमध्ये सर्वात फास्ट शतक झळकावणारा भारतीय खेळाडू म्हणून अभिषेक शर्माची नोंद झाली आहे. यापूर्वी हा विक्रम रोहित शर्माकडे होता, ज्याने 2017 साली इंदूरमध्ये श्रीलंकेविरुद्ध 35 बॉलमध्ये शतक पूर्ण केले होते.

अभिषेकने डावाच्या सुरुवातीला घाई केली नाही. फजलहक फारुकीच्या पहिल्याच ओव्हरमध्ये त्याने काही बॉल नीट पाहून घेतले आणि त्यानंतर एक फोर मारून खाते उघडले. पुढे मात्र त्याने अफगाणिस्तानच्या बॉलर्सना अक्षरशः धू-धू धुतले आणि एकापाठोपाठ एक मोठे विक्रम प्रस्थापित केले. त्याने अवघ्या 16 बॉलमध्ये अर्धशतक पूर्ण करत भारताच्या डावाला दमदार सुरुवात दिली. त्यानंतर पुढच्या केवळ 14 बॉलमध्ये आणखी 50 रन्स काढत त्याने शतक साजरे केले आणि नवा विक्रम रचला.

टी20 आंतरराष्ट्रीय क्रिकेटच्या इतिहासातील सर्वात फास्ट शतकांच्या यादीत भारतीय फलंदाजांमध्ये अभिषेक शर्मा 30 बॉलमध्ये (अफगाणिस्तानविरुद्ध) आघाडीवर आहे. त्याखाली रोहित शर्मा 35 बॉलमध्ये (श्रीलंकेविरुद्ध), पुन्हा अभिषेक शर्मा 37 बॉलमध्ये (इंग्लंडविरुद्ध) आणि संजू सॅमसन 40 बॉलमध्ये (बांगलादेशविरुद्ध) या क्रमाने नोंद आहे. एकंदर सर्वच देशांचा विचार केल्यास ही खेळी टी20 आंतरराष्ट्रीय क्रिकेटमधील तिसरी सर्वात फास्ट शतकी खेळी ठरली. या यादीत साहिल चौहान (एस्टोनिया) 27 बॉलमध्ये, मोहम्मद फहाद (तुर्की) 29 बॉलमध्ये अग्रस्थानी आहेत, तर अभिषेक शर्मा 30 बॉलमध्ये तिसऱ्या क्रमांकावर आहे. त्यानंतर जॉन निकोल लॉफ्टी-ईटन (नामिबिया), सिकंदर रझा (झिम्बाब्वे) आणि फिन ॲलन (दक्षिण आफ्रिका) हे तिघेही 33 बॉलमध्ये शतक झळकावणाऱ्यांच्या यादीत आहेत.

भारतासाठी हा ऐतिहासिक विक्रम प्रस्थापित करूनही अभिषेक क्रीजवर फार काळ टिकू शकला नाही. रशीद खानने त्याला बाद केले. अभिषेकची ही खेळी 108 रन्सवर संपली. त्याने ही खेळी अवघ्या 34 बॉलमध्ये उभारली, ज्यात 9 फोर आणि तब्बल 11 सिक्सरचा समावेश होता. भारतासाठी एका टी20 आंतरराष्ट्रीय डावात सर्वाधिक सिक्सर मारण्याचा विक्रमही अभिषेक शर्माच्याच नावावर आहे. त्याने 2025 मध्ये इंग्लंडविरुद्धच्या डावात 13 सिक्सर मारले होते.