मस्तच! मारुती सुझुकीच्या तीन नव्या कार बाजारात, मॉडेल्स, किंमत आणि मायलेज जाणून घ्या
मारुती सुझुकीने देशातल्या गाडी मार्केटमध्ये एक नवा प्रयोग केलाय. कंपनीने पहिल्यांदाच फॅक्टरी-फिटेड एस-सीएनजी सिस्टिम आणि ऑटोमॅटिक एएमटी गियरबॉक्स एकत्र असलेल्या गाड्या बाजारात आणल्या आहेत. यामुळे आता ग्राहकांना सीएनजीच्या स्वस्त इंधनासोबतच ऑटोमॅटिक कार चालवण्याचा अनुभवही घेता येणार आहे. देशातल्या वाहन बाजारात फॅक्टरीत तयार होणाऱ्या गाड्यांमध्ये सामान्य माणसाला परवडेल अशा किमतीत मारुती सुझुकीने ही नवी कार बाजारात आणली आहे.
कंपनीच्या सुरुवातीच्या लोकप्रिय मॉडेल्सपैकी तीन गाड्या या नव्या टेक्नॉलॉजीसोबत बाजारात उपलब्ध होणार आहेत. या तिन्ही गाड्यांना १.२ लिटरचं ३ सिलेंडर असलेलं झेड सिरीज पेट्रोल इंजिन देण्यात आलंय, सोबतच ५ स्पीड ऑटोमॅटिक मॅन्युअल ट्रान्सफरमेशन गियरबॉक्सही मिळणार आहे.
किंमत आणि मायलेजबद्दल बोलायचं झालं तर मारुती स्विफ्ट सीएनजी एएमटीची किंमत ७.९२ लाख रुपये असून ही गाडी ३५.३४ किलोमीटर प्रति किलो मायलेज देते. मारुती बलेनो सीएनजी एएमटीची किंमत ८.३२ लाख रुपये असून तिचं मायलेज ३४.४७ किलोमीटर आहे. तर मारुती डिझायर सीएनजी एएमटीची किंमत ८.५३ लाख रुपये असून ही गाडी ३६.४७ किलोमीटरचं मायलेज देते. तिन्ही गाड्यांची ही किंमत आणि मायलेज कंपनीने जाहीर केलं आहे.
या नव्या गाड्यांचं सगळ्यात मोठं वैशिष्ट्य म्हणजे क्लच-फ्री ड्रायव्हिंग. यामुळे ट्रॅफिकमध्ये सारखं सारखं क्लच दाबायचा त्रास ड्रायव्हरला होणार नाही. कंपनीने सांगितल्याप्रमाणे, मॅन्युअल व्हर्जनच्या तुलनेत या गाड्यांचं एएमटी व्हर्जन जरा जास्तच मायलेज देतं, आणि हे या गाड्यांचं खास वैशिष्ट्य मानलं जातंय. सेफ्टीच्या बाबतीत बोलायचं झालं तर या गाड्यांमध्ये ६ एअरबॅग्ज, ईएसपी आणि हिल होल्ड असिस्टसारखे आधुनिक फीचर्स देण्यात आले आहेत.
सीएनजी आणि एएमटी एकत्र आल्यामुळे ग्राहकांना बरेच फायदे मिळणार आहेत. मारुतीच्या सीएनजी गाड्या आधीपासूनच जबरदस्त मायलेजसाठी ओळखल्या जातात आणि एएमटी टेक्नॉलॉजीमुळे या मायलेजमध्ये फारसा फरक पडत नाही, असं कंपनीचं म्हणणं आहे. शिवाय ट्रॅफिकमध्ये वारंवार गियर बदलायची आणि क्लच दाबायची गरज राहणार नाही. नेहमीच्या ऑटोमॅटिक गाड्यांच्या तुलनेत, म्हणजे सीव्हीटी किंवा टॉर्क कन्व्हर्टर टेक्नॉलॉजी असलेल्या गाड्यांच्या तुलनेत, एएमटी गाड्यांची किंमत आणि मेंटेनन्स दोन्ही कमी असतं.
भारतीय गाडी मार्केटमध्ये टाटा मोटर्सनंतर सीएनजी ऑटोमॅटिक कार लाँच करणारी मारुती सुझुकी ही दुसरी मोठी कंपनी ठरली आहे. शहरांमधली वाढती ट्रॅफिक आणि पेट्रोलच्या वाढत्या किंमती पाहता या नव्या गाड्यांना ग्राहकांकडून चांगला प्रतिसाद मिळण्याची शक्यता वर्तवली जात आहे.
